蓮藕_450克 花生_30克 眉豆_30克 中型蠔豉_4隻
髮菜_1小撮(浸完會發大最少4倍)(髮菜可加可不加，對湯味影響不大）
水_5.5碗 瘦肉_少許(四厚片)
細個過時過節經常有「發財好事連有湯」
自從開始有翅、花膠等海味湯，就無飲過呢個湯
今年醒起曾經好鐘意呢個湯，就開始煲翻
但之前啲蓮藕唔粉同味淡，雖然都好味但唔係回憶中的味道
今次比我買到一個合適的蓮藕，啲湯蓮藕味好濃，蓮藕好粉仲有少少甜味，好好味
返工前將花生、眉豆、髮菜用冷水浸(有啲髮菜好多沙泥，要先用水沖，再用溫水加油浸再清洗，真正髮菜唔會甩色同埋有香味)
蠔豉用溫水浸，浸軟後再清洗，群邊位有時會有沙泥
蓮藕刨皮切件
凍水落薑、花生、眉豆，開中大火，水開始滾落瘦肉和蓮藕
水大滾校2段壓力關蓋，黃線過後未出現綠線前關最細火
開始計時加壓25分鐘，時間到關火等自動排氣
排氣完後加髮菜，再用中大火翻滾10至15分鐘(湯夠濃便可以關火加鹽)
全個過程63分鐘
花生、眉豆、蠔豉已經稔哂，眉豆無散到得翻個殼無哂啲肉，仲有得食
蓮藕好粉好易咬，非常好味
蓮藕大發現
街市賣的蓮藕大部份都係浸响水到，大大舊、白白淨，節與節中間無類似根的條狀物
但實在白得讓人生疑，同埋呢啲雪過，啲人又話雪過的蓮藕會爽，唔啱我
媽媽教路有泥的蓮藕先好食，仲要揀偏圓型的才會粉，就一直依這準則去揀
之前都係買有泥的，不過節與節中間又係無根狀物，係比較粉但唔係我食過好粉嗰啲
蓮藕味又唔算好濃，最奇係無絲，印像中藕斷要絲連
星期六行大埔墟街市，見有一間菜檔的蓮藕有泥，仲有根狀物
其實之前都見過類似的，但每節蓮藕仲細個拳頭，問菜檔老闆又話呢種用唻炒多啲就無買
今次見呢啲同印像中甚至係傳統國畫中的蓮藕好似，體積又正常
問檔主這種蓮藕粉嗎？一如以往所有檔主的回答：「好粉的」
又問佢同其他無根狀物的有何分別，佢話呢啲蓮藕味濃啲，好味啲
反正之前買的未如理想，又買嚟試吓，結果喜出望外，以後煲湯要選呢隻
有個檔主同我講過話雪過的蓮藕結構會緊密啲變得爽
呢個雪咗兩日竟然無呢個情況，應該係同蓮藕品種有關
蓮藕係冬季當造，檔主話過咗年就唔合時，所以依個時候買咗唔係即日食就要雪住
買有泥的有個問題，就係唔知有無爛，諗翻起，過年前買個啲無爛
過年後連同今次買過兩次都有爛，第一次無雪幾日爛咗成1/3，今次有雪爛咗少少
唔知係品質問題定真係天氣影響，要下年冬天先知
如果要幾日後先用，泥不用洗走，可以保存耐啲
沒有留言:
張貼留言