腐竹蛋花糖水

材料 (共5碗)

鮮腐皮_2兩    雞蛋_2隻     冰糖_適量     水_4碗

上星期在大埔富善街街市附近買到1包重半斤的濕腐皮

之前用開都係裝在無字透明膠袋嗰啲乾腐竹

用過幾次煲呢個糖水

啲腐竹好難先化開，又好油

所以都無煲一排

久不久都會出街食腐竹糖水，但無一間係用蛋花，而係一隻烚蛋

有無加白果都好，只係得腐竹加糖，味道好寡，尤其是出街食通常好甜

變咗好似飲「糖水」咁，唔係咁鐘意

買呢包腐皮時檔主話間廠兩日前做好送貨比佢

仲話呢啲腐皮好易散，用唻煲成豆漿都得

放冰格雪一個月都唔會壞，用時又唔駛解凍

睇樣都好似好新鮮，於是就用$14買咗一包

放咗冰格成一個星期先用，真係唔駛解凍可以一條條咁撕出唻

只係沖吓水就開始煲
  
聽人講腐竹要凍水落先容易散開
所以凍水落埋腐皮開火煲



 

當水開始滾，啲腐皮已經開始散開
水大滾時仲溶到變得好細粒
我鐘意有一片片腐竹的，就即刻落冰糖
到冰糖溶後真係變成豆漿咁樣
咁我就放多少少腐皮落去諗住唔煲咁耐就唔會散哂
等水滾翻就關最細火，加入已打好的蛋入糖水內
要一邊加蛋一邊攪拌先可以成為蛋花
點知加完蛋汁，啲腐竹又化開哂
試咗味豆味好香就唔再攪佢，食咗先

成個過程13分鐘攪掂
　
本來諗住預多1碗水等走水，點知過程快得劑
加埋蛋同腐皮溶咗，諗住煲3碗點知變咗5碗
如果5碗，用3隻蛋會好味啲

賽後檢討
濕腐皮好快化開，水滾先落都得，下次都係煲好糖水試啱味先放腐皮
咁樣比較易控制，見腐皮化開至適當大細就收細火加蛋熄火
相信成個過程唔駛10分鐘，企定定睇住成個過程先熄火都唔會好攰
至於凍水落腐竹易散啲，相信係乾腐皮先要咁做 

呢隻腐皮可以化到影都無
好適合煲腐竹白果白粥，揾日試試先