枝竹炆火腩

材料 (2人份)

材料：   燒肉_10件     冬菇_4隻     枝竹_2條     節瓜_少許(用剩的，可不放）
            薑_1片     蒜頭_2瓣     乾蔥_1粒
            (列出的材料如圖中份量，可自行加多減少)
調味：   蠔油_3湯匙     老抽_2湯匙     冰糖_1粒(如骰仔大小)     生抽_1湯匙    
　　　　紹興酒_少許     水_適量     生粉水_少許

枝竹炆火腩飯是茶餐廳熱門菜式

味道又濃又香口，又有汁撈飯，很適合男士胃口

所以我一直叫它做麻甩飯

去茶餐廳食飯，我都會點這個飯，因為這餸易煮很少會失手

至於豆腐火腩飯便很少會點

因平價食肆的豆腐通常係翻炸又翻炸，只係得層皮無肉

最慘重係食到變壞的酸豆腐

步驟

1. 冬菇浸軟去蒂切半，枝竹分開成小段(如不新鮮要先用水浸)

2. 用少量油爆香燒肉(可試味，如燒肉太咸可加少少糖，聞到香味後盛起)

3. 中大火爆香薑、蔥、蒜

4. 燒肉回鑊，燒熱後加紹興酒，酒揮發後加生油、老抽炒一會

5. 加水(蓋過材料約8成便可)、冰糖、蠔油(有些牌子蠔油較甜，有些較咸，建議先加2湯匙)

6. 水大滾後加枝竹、冬菇和節瓜，蓋上鑊蓋

7. 收中細火開始炆，炆時久不久「兜」吓避免黏底

8. 至水減少至適量時可試味（最少要炆20分鐘材料才會稔和入味)

    (如太甜加生抽，太咸加糖、味淡不夠鮮加蠔油)

9. 味道調較好後加生粉水即可

後記

我用李錦記蠔油，味道偏甜，所以要加生抽中和，如果蠔油本身偏咸便可以省去生抽

以上調味的份量味道較濃，跟茶餐廳的碟頭飯十分相似

愛濃味的老公食得好開心仲食咗好多，愛清淡的我只吃了少許便覺得很膩

枝竹好介紹

　

屋企附近街市賣的枝竹都係裝在無字透明膠袋，買過幾次都唔好味，好油同好韌

又懶得去深水埗樹記排隊，所以好少買

行經大埔富善街街市尾見到一檔專賣腐竹，啲貨好似幾得便買了一包枝竹

無字膠袋枝竹好多時好似受咗潮咁好難一「啪」即斷，呢啲枝竹脆啲好易斷

而且咁重調味都仲可以食到豆味，同埋好滑唔會好韌要咬好耐，好味道

老闆娘話包枝竹放陰涼處唔發霉可以放好耐

如果怕受潮可以加塊紙巾入去，我就加咗兩塊廚房紙

富善街街市同大埔墟街市都有呢隻合益枝竹賣，不過都係响雜貨店賣，唔係專賣腐竹

另外仲買咗一包濕腐竹（未用），老闆娘話呢批兩日前出廠，唔知佢啲枝竹係咪又係新鮮啲

下次見雜貨店有售又買嚟試吓比較吓