粽葉_22塊 咸水草_15條(要撕幼，可用幼棉線代替)
糯米_1斤(有剩) 開邊綠豆_12兩(有剩) 咸蛋_4隻 五花腩_4隻麻雀大小
糯米調味：鹽_3茶匙 油_4茶匙
豬肉調味：糖_1茶匙 生抽１湯匙 五香粉_2湯匙 油_1茶匙
一隻正常size的粽太滯，可以當正餐，粽對我就好似月餅，口痕就食，所以就包一葉粽
一葉粽即係成隻粽只用一塊葉包，細細隻，兩啖食完，咸肉粽唔係健康食物，食少啲好
不過，我的自家制以健康為首選，會改吓正常的食譜，調味通常比較輕手
如果唔落糖或者豉油食，我啲粽無乜味的，反正要點糖或豉油食，咁不如整時輕手啲
食時鐘意咸啲咪點豉油，適隨尊便
包粽要用肥豬肉貪佢油潤，我怕油膩改用五花腩，試過用梅頭，夠瘦，但好硬，投降
街買的粽，糯米與綠豆的比例大部份係2:1甚至仲少，綠豆比較貴，同埋包起上唻唔會走綠豆
我鐘意食綠豆，所以比例大啲，綠豆多到會破糯米而出
食粽時切開隻粽比較麻煩，用刀切會好黏刀又難洗，筷子夾開都係黏
用翻啲咸水草綁住隻粽兩邊拉，可以「界」開隻粽，切口又齊整又唔需要洗刀
同樣方法用嚟切咸蛋黃都得，無咸水草用線代替都可以
準備功夫
粽葉和咸水草洗乾淨，用清水浸兩次，每次最少4小時，之後再用滾水烚15分鐘
剪去粽葉頭尾兩邊尖位約3寸
糯米浸水4小時，隔水後混入調味料
開邊綠豆浸水4小時，隔水(可跟糯米一樣加鹽、油)
豬肉調味後最少放1小時
咸蛋黃一隻開6份
包粽
粽葉葉脈凸出的是底，材料放滑的一面，於葉尖部份(中間葉脈軟的一邊)約1/5位置對摺再把下方摺上，然後打開成兜狀
先鋪一茶匙糯米，面加大半茶匙綠豆，放入咸蛋黃和豬肉，再放大半茶匙綠豆，最後鋪上一茶匙糯米，把沒有粽葉包住的材料壓實
把葉覆上蓋好，紮上咸水草即成。不用紮太緊，因烚時粽會膨脹，剛好紮實不彈出即可
講點包有啲難度，下面啲相希望有幫助講解
烚粽
凍水放粽，水一定要蓋過粽，沒有水蓋過的粽會生，可以預多少少水
調較2段壓力，加壓30分鐘，自動排氣後即成
後記
包粽最緊要係學點包，包乜嘢材料由你定，有幾隻我包了乾瑤柱
一開始時包時有點手忙腳亂，包了5隻就上手了，包得唔靚的粽會好黏葉
糯米同綠豆最好隔乾水先包，否則一邊包一邊滴水，攪到四圍同隻手好污糟
我用的是4.5L煲，要分兩次先煲得哂
雖然麻煩，但烚的過程唔熱，最好係唔會走水
前幾年試過走水唔加，諗住熱力可以蒸熟，點知部份粽半生熟(生的部份硬硬哋)
煲成2個幾3個鐘又要不時加水，好花時間同心機，所以幾年無整
今年有高速煲，用唻烚粽一流，唔駛睇火唔駛加水，以後唔怕烚粽
沒有留言:
張貼留言