沙葛_1個 牛柳_2兩 雲耳_一兩 薑_2片 乾蔥_1粒 蒜頭_2瓣
醃料
糖_半茶匙 生抽_2湯匙 生粉_1茶匙 油_1茶匙
獻汁
蠔油_1茶匙 生抽_2茶匙 糖_1茶匙 生粉_12茶匙 水_一碗
沙葛其實係很好的食物，可以降血壓、生津止渴、清涼去熱
價錢唔貴，一個唔駛$10，口感爽脆，帶有少少甜味，很討好
食沙葛通常都係炒土魷、魚餅
炒土魷好味到不得了，非常香；炒魚餅就味淡啲，但煎香魚餅，一種爽口一種香口，都好味
今次買咗個沙葛唔想炒土魷，因為呢輪燥熱；又唔想炒魚餅，因為唔鐘意食魚餅
上網睇吓有乜新食法，見到呢個餸都幾易就學吓煮
不過都係無跟足食譜，醃料同調味都走麻油
以前好鐘意麻油，後來覺得麻油味幾霸道，好容易蓋過其他調味的味道，所以就少用了
步驟
1. 雲耳用清水浸軟
2. 牛柳用醃料最少醃15分鐘
3. 沙葛去皮切薄片(比較難炒熟的)
4. 將牛柳爆至5成熟(還有血)，盛起備用
5. 洗乾淨鑊，爆香薑、乾蔥、蒜頭，沙葛落鑊炒至半透明和軟身，邊炒邊加水避免炒燶
6. 放入雲耳，炒一會後加入牛肉
7. 加進獻汁，大火快手兜勻材料，至獻汁變稠完成
處理沙葛
新鮮沙葛的皮可以一撕到底，這次買的不太新鮮，撕到中間就斷，可以在斷口位用小刀批起啲皮又撕過
沙葛好難炒熟，一定要切薄片，如果太厚，唯有加多啲水蓋鑊蓋焗淋，咁做就不爽脆了
沙葛含糖量比較重，如果大火猛炒，好容易炒燶，所以炒時要不斷加水，既可防燶又可以快炒熟
沒有留言:
張貼留言