燉橙 - 止咳良方

材料

橙_1個     鹽_半茶匙    

燉橙絕對唔係甜品，不過費事開多個新標籤，索性放入甜品類別

話說老公每日久不久因喉嚨痕咳兩聲，都持續咗一段時間

燉橙呢個止咳方法早有聽聞，見佢飲完成枝佩夫人止咳水後打個邊爐又咳翻

而咁啱有個橙放咗好耐都唔想食，就攞唻燉咗佢

收止咳功效就最好啦，唔得的話當食個水果都無壞

反正又唔難攪

燉好後要成個橙啲肉食哂，用茶匙好容易可以起到啲肉

碗裡面都有啲水，一定要飲埋佢，話係精華所在

至於味道，啲橙肉又咸又甜咁，老公話好味，我寧願食橙

啲水就又咸又少少苦，不過得一湯匙到，一口飲完

步驟

1. 洗淨橙後切開頂部

2. 橙肉’界’三刀

 

3. 加鹽

4. 把橙頂部蓋上後用牙簽拮好

    (呢個舊橙個底唔好樣，我用4枝牙簽撐起佢，其實係無需要的)

5. 水大滾後放入碗內中大火隔水燉20分鐘即成

後記

燉橙要視乎火力，用中火至中大火燉，食時會有少少果皮的味道

如果火力唔夠，會食到新鮮橙味

果皮係「理氣」，估計如果燉唔夠同食橙無乜分別

網上話用鹽燉係治寒咳，用川貝治熱咳

雖然唔確定老公係乜嘢咳，不過一食無妨

見佢食咗真係少咗咳，佢都話喉嚨舒服啲

咁都好吖，至少佢嗰晚無咳

不過咁樣咳咗幾個月，個病唔係咁淺

所以都係叫佢睇中醫斷咗尾好啲