粟米香腸粒煎蛋

材料(2人份)
雞蛋_3隻     新鮮粟米_半條     雞肉腸_3條     蒜_1瓣

調味
糖_1/2+1/3茶匙     生抽_1/2湯匙
(調味因人而異，粟米甜可少放糖，用其他腸較甜要放鹽，如果香腸好咸，蛋又唔駛落咁多生抽）



雪櫃成日有剩餘物資同食材，如果唔食好容易會遺忘同放太耐掉咗佢
半條粟米係上星期煲湯剩落，得咁少唔知點處置
諗諗吓雪櫃仲有買咗一個月的雞蛋，冰格又有雞肉腸，不如煎蛋啦
雖然無食過無見過，但同其他材料切粒煎蛋差不多
粟米同雞肉腸應該無問題，食早餐都會呢3樣嘢組合一齊食，味道都好夾

以前用平底鑊煎蛋、炒蛋，次次翻蛋時攪到亂七八糟
成功剷得起又會令到啲蛋好老，最叻係加好多油煎燶邊太陽蛋，但唔翻蛋，否則蛋黃實穿
後尾用咗圓底生鐵鑊，就乜蛋都煎得掂，最好係唔黏底，用不黏平底鑊都黏到飛起

步驟
1. 雞肉腸切細粒，拆粟米粒
2. 雞蛋打勻後加生抽
3. 熱油爆香蒜片，放雞肉腸煎香，落1/2茶匙糖快炒後熄火(否則易燶)，備用
4. 熱油放粟米粒，炒熱後加兩湯匙水，待水收乾粟米變稔加1/3茶匙糖，快炒後熄火，備用
5. 將放涼的雞肉腸粒和粟米粒跟蛋液混合
6. 燒熱鑊和油(要大量才不黏底和蛋滑)，
　 蛋餅 － 倒入混合物收中大火，先煎熟一邊才翻蛋餅，收細火煎一會蛋餅便不會太老
    嫩蛋 － 倒入混合物後收中火，快手兜炒至6成熟，餘溫會令蛋再熟少少唔會太生
    (下圖左手邊的是嫩蛋，比較不成形和不會燶，右邊是比較香的蛋餅)



分享

拆粟米粒
拆完整的粟米粒好容易，但要有心機
第一直排最難拆，用小刀放入其中兩直排的粟米中間，撬出一直排後(也可用手搣，但粟米粒太密好難)，用手指公內側稍為用力把粟米迫到已撬走一排的空位就可以。就好似刨粟米，刨走一至兩行後，用下前排牙攝入粟米的罅位就可以撬粟米粒出唻

雞蛋調味
有啲人話蛋液放鹽會有化學作用產生有毒的「氯」，啲蛋會變綠色
不過早已有人話唔會同埋蛋綠色係太熟的原故
我試過落鹽啲蛋變綠色，有無毒都好，嗰隻綠色好似真係食咗會中毒咁色
所以自始蛋液只落生抽，只係落少少吊尾，唔會變深色得好緊要

變化
如果加啲洋蔥粒、磨菇粒、甘荀粒等，再落啲茄汁、白汁或者芝士，就可以變奄列當早餐食