雞翼_8隻 薑_2片 蒜_1瓣 乾蔥_3大粒 老抽_2湯匙 冰糖_1粒 水_適量
醃料
雞粉_1茶匙 生抽_1湯匙
豉油雞翼由細鐘意食到大，骨同肉好易分離，肉好滑，汁又好送飯
老公都鐘意食，所以久不久會煮
呢個餸煮過好多次，連老公都學識點煮
不過就未試過用高速煲整，貪得意又試吓
用翻一直用鑊炆的方法，煮完賽後檢討先諗到應該改一改方法就翻高速煲
步驟
1. 醃料醃雞翼最少15分鐘
2. 燒熱煲(夠熱彈水珠落去粒水珠會跳)
3. 落油，油滾後有油紋收中小火，落薑，蒜，乾蔥爆香
4. 放雞翼煎至兩邊金黃
5. 落老抽，冰糖和水(剛蓋過雞翼就可以，我用了１碗半)，開中大火，調較2段關蓋
6. 錄線出現後收最細火煮3分鐘
7. 自動排氣後中火收汁，試啱味即成
後記
由於怕太快太熱會令到個煲底變型，所以用中火熱個煲，足足等咗幾分鐘先夠熱
倒咗啲油落去，唔記得要熱到出油紋先可以爆料頭，香咗就放雞翼
結果有少少雞翼皮黏底仲黑咗，好彩炆完後已經甩咗好多，剩低少少刷一刷就無咗
由開爐到油熱時間好長，跟住又要排氣，計計埋埋啲時間其實同用生鐵鑊炆差唔多
用鑊仲唔駛理啲油點樣先算夠熱，總之料頭香就放雞翼，實無黏底
同埋用高速煲只滾3分鐘，唔知夠唔夠時間入味，事前又要醃定，多咗重功夫
排氣開蓋後啲汁好似啱啱倒入去咁樣，完全無混合，要開火收汁先變濃
在試味時覺得好麻煩，因為用鑊煮時我中途已經試啱味
用高速煲如果之前唔夠味，加調味再煮一陣其實雞翼唔係好入到味
後來諗諗吓，不如調咗個汁試啱味(略為淡少少因要收汁)先倒入煲
咁最後煲完個味係點咪心中有素，但咁做又多咗重功夫
仲有爆雞翼時我會灒啲酒等味香啲，但灒酒入煲有難度
酒太多唔得，太少未兜勻就分佈喺煲底蒸發哂，又或者藏咗入煲底啲罅度
諗來諗去，唔想做咁多功夫，下次應該用翻鑊煮
仲有就係用高速煲煮完啲雞翼會細隻咗
用鑊煮都會，但今次真係縮好多，老公都咁覺得
雞翼又比較乾同「鞋」，我估係高溫連啲雞油都迫埋出嚟所以啲肉無咁油潤同埋變細咗
或者煲2分鐘會好啲
小貼士
雞翼大多係急凍，最怕食到雪藏味同有血，要去雪味，一定要無血水響入面
出面食肆會「啤」水(開水喉係咁用水沖)，但好浪費食水
我就會先解凍等到軟身(可以之前一晚放落下格)，沖吓水就用微溫的淡鹽水浸
有時醒起又會加少少酒浸，浸一段時間，換一次清水再浸一陣就得
通常我返工前用淡鹽溫水浸，如果天氣太熱就放入雪櫃，放工整其他嘢時就浸一陣清水
以前次次都被投訴有雪藏味，用咗呢個方法好耐無試過
開頭煮呢個餸，硬係差咁啲味，唔夠媽媽煮的香同汁無咁稠
問咗媽媽有乜特別要注意，原來係要多啲乾蔥
又係喎，乾蔥啲味好香，同埋炆完會溶咗，啲汁會稠啲，唔駛打獻都得
每次最少炆20分鐘，如果即刻上碟即刻食，啲汁點都唔會掛係雞翼上面(我唔鐘意打獻)
尤其係雞翼背面，白雪雪睇見都無味，唯有係咁淋汁
後尾發現煮完放佢入電飯煲焗住佢，會好上色同掛汁，仲入味好多
所以次次煮都會預先煲定飯，等飯煲跳咗制將成碟煮好的雞翼同飯焗一陣
與此同時去整埋另一個餸，咁雞翼就唔會放涼，一舉兩得
(唔介意的話，用微波爐叮一陣都有相同效果）
沒有留言:
張貼留言