鹽焗蟹

材料：
奄仔蟹_8兩     粗鹽_約12兩     紹興酒_2湯匙(可以不落)    
 
　
 

突然好想食蝦蟹，6點幾去到街市，點解得咁少海鮮賣?
問問老闆原來是日清明，漁民今日都無交貨
蝦完全買唔落，明知唔當造都是但買隻蟹仔頂住癮先
 
牌到寫係奄仔蟹，不過蟹顏色好深，又偏大隻(8兩)，係屬於無咁好味嗰種奄仔
無買蝦又太想食蝦蟹，就照買
本來係想買雌蟹，但得翻好少得揀，見啲爪夠齊無甩，反轉佢又好生猛爪係咁郁
啲爪同殼夠乾淨，雖然係公都照買
 
由於鐘意食，細個就識劏蟹，用筷子插入第二、三隻腳中間的位置就會攪掂佢
唔駛好用力之餘仲會令佢去得快啲
但呢隻蟹放響度時好斯文，一放落碗盤突然變得好惡，反轉佢一排掂吓佢啲爪係咁郁來郁去
無佢辦法唯有反轉佢響蓋頂大力拍枝筷子落去，掙扎咗一陣先唔郁
 
去過好多到點鹽焗蟹無一間肯整，次次都係油鹽焗蟹，今次自己煮
為免焗時留走哂啲膏同啲肉掂到啲鹽會太咸，所以原隻焗唔劏
不過要用牙刷刷乾淨，仲要揭起塊「奄」洗刷，洗好後就煮得
 
1. 白鑊炒鹽至乾身同少少金黃
2. 炒時可落少少紹興酒，會香啲，炒好後盛起
3. 再放鹽落鑊，先放份量足夠墊得住隻蟹的下層，再反轉隻蟹放，將餘下的鹽倒入蓋住蟹

4. 蓋上鑊蓋大火蒸5分鐘後再轉中大火蒸10分鐘
5. 食之用掃掃走啲鹽(我懶，只係撥走佢，所以重有鹽剩）
 
後記
由於今次隻蟹係綠膏，為免大家覺得肉酸所以唔放蟹膏相
深綠色膏唔好樣（似松葉蟹/毛蟹膏咁樣），但好軟好滑好香
以前以為係壞咗，後來上網先知係因為佢食海藻，所以咁樣色
啲蟹都甜，呢個價錢算係好得

粗鹽只係用街市$3一包嗰啲，因用量都幾大又唔可以翻用

我最常用隻生鐵鑊，今次用隻唔多用的不黏底鑊唻煮
由於隻蟹會出水，底層啲鹽會結成塊同黏鑊，要剷先剷乾淨鑊面啲鹽
煮完洗完隻鑊仲有好大陣蟹味
好彩無用到至愛的生鐵鑊